القاهرة . أحمد فتحى رزق
س : ما أقوالك في ضبطك متلبس بمبلغ 150 مليون جنيه ؟
ج : ايوة حصل يافندم
س : وهل هذه الاموال تخصك ؟
ج : أيوة طبعا تخصني , اقدر اعرف بقى فين المشكلة ؟
– احنا هنا اللي بنسأل مش سيادتك , انت معترف انك بتمتلك 1500 مليون جنيه وتقوللي ايه المشكلة !!!
– يافندم ممكن تعرفني ايه المشكلة في 150 مليون جنيه في دولة الجنيه فيها بيمثل 55% من الدولار ؟
– انت ياأستاذ بتهرج ولا بتتفلسف فلسفة كدابة ؟ 1500 مليون جنيه في ايد موظف حكومي وتقوللي دولار ويورو ونسبة ؟
– طب سؤال خارج السياق يافندم , لو رحنا بيت سيادتك هنلاقي في الكومودينو بتاعك كام مليون دولار ؟
– انت اتجننت ياسافل يامرتشي ؟ , انا هازود عليك قضية اهانة ممثل النيابة
– مش فارقة يافندم لانها مش قضية تمس الشرف , الشعب كله بيتكلم عن تجاوزاتكم وقضاياكم المتفبركة اللي بتستلموا فيها الحكم مع اوراق القضية , يعني انا واحد من الشعب قدرت اقول المحبوس في قلوبهم ناحية هيئتكم الموقرة , يعني من الاخر شيخ المنصر بيحاسب واحد من عصابته
– انت كدا فاكر انك بطل وقدرت تحول دفة الموضوع وتغير اتجاه القضية ؟
– القضية دي كلها بلح ياحضرة الوكيل , طالما انهم سمحوا فيها بالنشر تبقى بلح , لكن قضايا هشام جنينة بتاعة حجم الفساد الحقيقي اترمخ عليها واتهموا الراجل في شرفه وحظروا نشر كلامه , انت لسة صغير ومش هاتفهم انك اداة للدولة في لعبة ( بص العصفورة ) اللي بتتعمل للشعب عشان يلاقي حاجة يرغي فيها بدل ما يتكلم عن خيبة الحكومة اللي مخلياه بيشحت ومش لاقي اكل ولا دوا
– وقضيتك بقى اللي هتشغل الشعب ياتافه ؟
– ممكن اكون تافه زي ماحضرتك بتقول , لكن الاعلام بتاعنا ممكن يضخم الصورة الف مرة عشان يخليها على السطح زي التنويم المغناطيسي بالظبط , قوللي حضرتك فين ال30 مليار اللي مصر حصلت عليهم من الخليج ؟ فين فلوس صندوق النقد ؟ فين فلوس تحيا مصر ؟ كل دي اسئلة محتاجة الف وكيل نيابة عشان يعرف حجم الفساد الحقيقي في مصر وصل لفين ، أنت بتحقق مع حرامي غشيم عشان متقدرش تحاسب الحرامية اللي بجد اللي ماليين البلد
– ماشي ياحضرة المناضل عندك اقوال تانية ولا نقفل المحضر ؟
– لا ياباشا معنديش اقوال تانية بس أحب اعرفك ان المحضر مش هيتقفل الا لما المخرج يقرر يتقفل , هتفضل كل يوم تسمع مفاجات وانبهارات في القضية والناس ترغي اكتر , لحد لما المخرج يقرر ينقل الاكشن لفضيحة تانية لحد من الرجالة اللي متعاونتش مع منظومة الفساد وقرر يفسد لوحده خارج السرب
– اكتب يابني وقرر المتهم ماتم ذكره في اوراق القضية بحضورنا نحن ….
استنى يابني لما ارد على التليفون , أيوا ياباشا اعترف حضرتك , حاضر يافندم 33 ايام على ذمة القضية زي تعليمات سيادتك , أيوة يافندم بقى ب٢٠ جنيه بس لحضرتك السعر على قديمه ياباشا ، يافندم احنا رجالة سعادتك وتربيتك 
???? ، بسلامة الله يافندم
اكتب يابني ٣ ايام على ذمة القضية خلينا نخلص من الكلام مع الفاسد دا
#دولة_الفساد
